اخر الاجيال المحترمين

نعتذر لاطفال هذا الزمان..نعتذر للاجيال الحاليه والقادمه..نعتذر لاجيال المستقبل..نعتذر لاطفالنا واطفالكم..
نعتذر لهم..
لقد كنا اخر الاجيال المحترمين..
احنا اللي شفنا تليفزيون ابيض واسود..احنا اللي عشان نقلب القناه كنا بناخد قرار في سنه..احنا اللي كان عندنا قناتين في البيت اساسيين..اولي وتانيه..احنا اللي اتجمعنا على حاجه واحده من صغرنا..مسلسل الساعه 7 على اولي وبعدين بقي 8..الساعه 10 الصبح على تالته بعد ما نتفرج على النشره الالكترونيه ونعرف النهارده الجو هيبقي ايه كنا نستني عالم كارتون..استاذنا ايمن..اتوبيس المدرسه السحري..كنا بنتفرج على سهره واحده كلنا نحكيها في تاني يوم..السبت نادي السينما على اولي والحد فيلم عربي على اولي واجنبي على تانيه والاتنين تاكسي السهره والتلات فيلم عربي والاربع فيلم واخترنا لك والخميس مسرحيه..الجمعه من بعد الصلاه عالم الحيوان والشعراوي وفيلم ع العصر وماتش الاهلي والملعب اللي نصه شمس وصوت محمود بكر او مصطفي الكيلاني او ميمي الشربيني اسعد الله مسائكم بكل خير..الموسيقي المميزه للماتشات..المدرسه يوم السبت كانت تقيله وبرد بس بتبقي فرصه نحكي عن مسرحيه الخميس وفيلم الجمعه والفخر بالاهلي او تريقه ع الزمالك..يوم الاربع ده احلي يوم في المدرسه عشان مجرد ان بكره الخميس اللي هنلعب فيه كوره وبعده اجازه..يو التلات مكنش حلو عشان لسه بكره الاربع اللي بعده الخميس اللي هنلعب فيه كوره وبعده اجازه..احنا اللي كنا بنشم ريحه رمضان..احنا اللي اتلسعنا من شمعه الفانوس واتعورنا من صاج الباب بتاعه وعملنا فرح لما عملو القعده بالشمعه بتتفك لوحدها وصباعنا اتحرق من بخار نار الشمعه وهو طالع من الفتحه اللي فوق وافتكسنا الرباط الدوبار..احنا اللي شفنا اعلانات حسن عابدين لشويبس واعلانات الصمدي وكوفرتينا في الصباحيه وزلاطيمو وهولز بتاع البطريق ورابسو وسافو ولبان سحري عايز احمر امضغ في الاول لون اخضر..احنا اللي كان مصروفنا نص جنيه بنجيب بيه شيبسي ب35 قرش وغلى بقي ب 40 قرش وكاراتيه ببريزه وبشلن لبان او مصاصه جواها لبانه..(من باب ضرب عصفورين بحجر)..احنا اللي مثلنا الافلام في الشارع وعملنا جزيره الشيطان والفانوس السحري ومسرحيات عائله سعيده جدا ولما جت الواد سيد الشغال عملنا فرح..احنا اللي كنا بنبوس التليفزيون لما يجيب مسرحيه لمحمد صبحي..احنا اللي بنعشق سك على بناتك..احنا اللي لعبنا عسكر وحراميه واب وام ولعبنا كوره بالعساكر البلاستيك..احنا اللي سمعنا العالم صوتنا واحنا بنقسم ماتش في الشارع ونتخانق على مين يقاصد مين وينتع مونولوج مصر سوريا فلسطين ليبيا الجزاير امبابه امبابه امبابه عشان نقسم الفرق..(هاخد رامي..لا ياعم رامي حريف..خلاص هاخد معاه محمود عشان حمار ..هبقي اوقفه جون)..مش عارف ليه كان عندنا ثقافه ان حارس المرمي هو دايما الشخص اللي مبيعرفش يلعب..احنا جيل التمانينات ..اخر الاطفال المحظوظين..احنا اللي عندنا حاجه نقولها لما تسالنا عن زمان..احنا عندنا ماضي....!!؟
لذلك نعتذر..نعتذر لاطفال هذا الجيل والاجيال القادمه..نعتذر لما فعلناه بكم وما قدمناه لكم من الغاء لعقولكم ولاغتصاب لطفولتكم..نعتذر لمحونا بكل عنف لذكري تبتسمون عند ذكرها عندما تمتلكون القدره على التذكر..نعتذر لكم بكل قوه..
وبكل اسي..
ونقبل اعتذار الذين من قبلنا لنا.........ونحسدهم
فان لهم من الذكريات ما لم نعلم

مسرحيه جديده

بسم الله الرحمن الرحيم

ان شاء الله هنبدا بروفات عرض مسرحيه الغريق (اسم مبداي) تاليف محمود ابو دومه ومن تنفيذ محمد مبروك ومن انتاج شركه لايف كونسبت ومن اخراجي....اي حد شايف عنده موهبه التمثيل يتصل بينا على 0107054378 او يبعت على الايميل وان شاء الله يكون معانا

قشطه

crazyboy_aym@hotmail.com

رساله في حب عاهره

1

اعرف اني رجل بائس
اعرف ان الحظ السيئ ..
قد ترك الارض باكملها..
قد ترك البشر باكملهم..
قد ترك الامطار تسيل ..
وترك الاقمار تضئ..
وترك رجالات العالم ..
ووقف ببابي كالحارس

2
اعرف اني رجل بائس..
3
اعرف ان بلمسه يدهم..
ان بحركه فمهم..
ان بنظره عين منهم..
تذهب معهم..
اعرف ان لو وضعو الاموال بنهديها ..
تتوقف كل سويعات الشرف ..
اعرف ان بلمسه يدهم..
تتحرق الاف الكتب..

يتغير مقياس الزمن

..تزداد ممرات العفن..
اعرف ان بحركه فمهم..
اهتز كحيوان الرند ..
اشتعل كنيران جهنم..
وافيض كانهار اليمن ..
4
اعرف ان حراره يدهم..
لتذيب الاثلاج بقلبي..
وتذيب ثلوج شمال الارض..
وتحرق اشجار الكاميرون..
وتشعل ادغال الامازون..
واعرف ان الغيره عندي..
تجعل نيران قذارتهم..
بارده كمساء المدن..
5
اعرف يا ساده اني ..
الاف ملايين العشرات..
الاف ملايين المرات..
اني رجل بائس..
اكثر رجل بائس

الريس

رجعت اليوم ده متاخر..عادي..زي اي يوم..لما برجع بدري بحس ان اليوم اخيرا بقي طويل..رجعت متاخر وغيرت الهدمتين ودخلت نمت..اول ما لمست السرير حسيت انه مختلف..بقي احلي..بسرعه جدا رحت في النوم..مكنتش اعرف ان النوم المره دي هيكون مختلف

- اامر سيادتك يا فندم..
- اامر بايه؟
- حضرتك ضربت الجرس ..!
- جرس ايه؟؟؟ ثم انت مين ؟؟؟؟
- انا مين؟؟؟ ... حضرتك كويس النهارده..
- اه كويس جدا ..بس ايه المكان الغريب ده .. وانت مين ؟؟
- يا فندم انت في قصرك ..وانا خدام سيادتك ..
- خدامي ... وقصري .. انا ..
ساعتها عيني وقعت على كارت ادامي وعليه اسمي .. وتحت الاسم ..
رئيس الجمهوريه
يانهار مش فايت..ده الحلم شكله النهارده هيبقي دلع .. شطحت انا المره دي .. بس قشطه..لا وحلوه حكايه ان الرئيس الجمهوريه هيكون له كارت..زي اي نجار بيحترم نفسه يعني..المهم اني رئيس جمهوريه مصر العربيه..على كارت بقي على شربت المهم اني الرئيس..العب 
قرارات اول يوم ....
1. عزل وزير الثقافه فاروق حسني ووزير التعليم يسري الجمل ووزير التضامن الاجتماعي مصيلحي العظيم..
2. عزل رئيس المطافي اللي اعتقد ده اول رئيس مطافي تتحرق القاهره على حسه بالكم ده من بعد حريق القاهره الشهير..وفي كل مره تتحرق فيها حاجه المطافي توصل بعد ما الناس ربنا يكرمهم يطفوها او تطفي لوحدها عشان يباركو ويقولو للاهالي حمد لله ع السلامه ..
3. الغاء عربيه السيدات في مترو الانفاق .. مهم كده كده بيركبو معانا..وللسيدات اللي مبتركبش الا في العربيه دي هنعمل مترو للسيدات ..وييجي كل نص ساعه..واللي مش عاجبها تتلزق بقي..
4. منع الستات من السواقه...عشان بجد كفايه..
5. الغاء الاغاني اللي بتتذاع في المترو من اول اغاني مجد القاسم لحد دقيقه حداد والحاجات اللي زي كده..
6. الغاء جميع اعلانات المترو من اول "ايديا ديا ديا عزاز على"..لحد موبينيل اتكلم من القلب..
7. وضع عسكري ادام كل عربيه في المترو في جميع المحطات خصوصا مبارك والسادات والعتبه ودار السلام عشان شوفو بقي مين اللي هيركب من باب النزول وينزل من باب الصعود عشان اطلع تلاتين امه....رئيس بقي
8. الغاء القناه التالته..والخامسه..
9. حسام داغر يبطل يضحك في موجه كوميدي..
10. الغاء اعلانات موبينيل كلها عشان بيبالغو اوي..خصوصا موضوع انهم بقو 20 مليون ده..ثم هي مصر كلها فيها كام واحد معاه موبايل..موبينيل الشبكه الوحيده اللي عملائها بيزيدو زي الفيروسات..
11. عمل مبني كبييييييييييييير نحط فيه كل اطفال الشوارع يشمو فيه زفت ويلعبو كوره ونبني لهم مقلب زباله كبيرعشان يرتاحو في النومه..اهو بدل الشوارع..
12. اي كلب ييجي لاتنين ماشيين يقولهم ورد وفل وشيكولاته وهباب مطين على دماغه هحبس امه .. 
13. الغاء الفالنتين..بلاش وجع قلب ونفاق بقي..
14. الغاء نادي الزمالك..ونقلبه نادي فيديو..ونبيع كل اللعيبه ونجيب فنلات ودراعات بلاي ستيشن وترابيزات بنج..ولو اتبقي فلوس نبقي نعمل وجبه كده زي بتوع المدارس زمان..رغيف عيش بلدي واحيانا رغيفين فينو وحلاوه ومربي فيتراك تين او فراوله وبرتقاله ابو سره وبيضه ..خلي العيال تسمن..
15. في الجامعات المصريه اي مكتبه هتتنيل تصور ورق للعيال تحط الهباب الاسود ده عشان الورق ميتصورش تتقفل..بقفل كبير..وتجيبولي المفتاح..هو العيال هتذاكر وتتعمي على اخر السنه..!
16. الغاء اسم الاخوان المسلمين ..نخليه الهُبل..
17. زي استدعاء الجيش..يستدعي من كل اسره مصريه شاب على الاقل.. والاسره اللي مجابتش رجاله تاخد اعفاء..ينزلو الشباب دول ينضفو شوارع مصر كلها..كل مجموعه شباب في منطقتهم..ويساعدهم الحرس الجمهوري والجيش وحرس الحدود وانبي والاتحاد السكندري وشويه العيال اللي بعناهم من الزمالك وبالذات عبد الحليم على ..خلي البلد تنضف..من الزباله طبعا مش من عبد الحليم..
18. روبي تبطل غنا وتمثل بس ..
19. هيفاء وهبي تبطل غنا وتمثيل .. ترقص بس ..
20. خالد يوسف يتحبس..لو سألكو ليه قولوله عشان مربي دقنك..
21. يا عادل امام ومحمود عبد العزيز يتنيلو يعملو الفيلم اللي محنثينا بيه من 3 سنين يا ينزلو تكذيب ونخلص..
22. مش هفتح برده المعابر..
23. هقفل الدستور..لانها هتعترض علىّ برده وخلاص ..ولما امسك الحكم ابراهيم عيسي هينزل مانشيت يقول ما اسخم من ستي الا سيدي..هو عايز البلد من غير حكومه باين..
24. اي ولد هيعاكس بنت بمجرد الكلام - سواء التقليدي زي (يا عسل ,ياجمل, ادلع ياجمل, "الصفاره",) او الافيهات العتيقه زي (اجمل واحده اللي في النص , اجمل واحده اللي لابسه بنت حمرا ,) او المباشره زي (يخرب بيت جمالك , انتي زي القمر على فكره) او القبيحه زي (ماتيجي ..انا شقتي واسعه والحاجه مسافره) – هحبسه تلات سنين ....لا اربعه.. وياعيني لو تحرش بقي او مد ايده .. يا سيييييييييدي .. ده مش هنزله حكم ده سيبوهولي ....
25. يا هحبس ممدوح فرج يا هقتله على حسب ...
كفايه كده قرارات اول يوم .. بكره نقول قرارات جديده ..